E janz klei Besje Songtext
von Kasalla

Dä Anfang wor einfach, fass wie e Spill
Ne Aurebleck wie ne Blitzschlach
Dä Himmel jeföhlt
Op Wolke jebettet
Bedronke vör Jlöck
De Stääne e Leed jesunge, völlich verröck
De Dache verjinge un die Liebe bliev do
Mer han uns jezähmt un ne Dach wor e Johr
Un beim eetste Räänschuur han mer nor jelaach
Dä Draum jing wigger, mer sin opjewaach

Un ejal wohin do jeihs, e janz klei Besje
Vun mir jeiht met dir met
Un ejal wo do och bes, e janz klei Besje
Vun dir bliev einfach he bei mir


De Zick heilt alle Wunde un erstick jede Keim
Us Loss weed Jewohnheit un us "Jo" e "Vielleich"
Wachlieje un waade
Zo feije zom fliehe
Zo vill Angs jet zo ändere
Sich noher zo verliebe
Immer tapfer jeschwieje, vörbeijelääv
Jeder määt su sing Levve un fröch av un zo wie et jeiht
Als mer lang ald jestorve wore, wor et endlich vörbei
Hannelore un Helmut, un nit Bonnie un Clyde

Doch ejal wohin do jeihs, e janz klei Besje
Vun mir jeiht met dir met
Un ejal wo do och bes, e janz klei Besje
Vun dir bliev einfach he bei mir

Un ich weiß, ich lüg nit, wenn ich dir saach
Do es noch jet üvverich, weil ich dich immer noch mach
Ich hoff do fings druße vielleich su jet wie Jlöck
Un wenn do nit weiß, wo do hinsolls, dann kumm doch einfach zoröck

Un ejal wohin do jeihs, e janz klei Besje
Vun mir jeiht met dir met
Un ejal wo do och bes, e janz klei Besje
Vun dir bliev einfach he bei mir
Einfach he bei mir
Einfach he bei mir
E janz klei Besje vun dir bliev he