Südsee Songtext
von Sigi Maron

Waun de Kinda meine Zechn pockn
Silanisierte frische Sockn lockn
De Sunn durch de Fensterritzn locht
A blade Taubn ihr erstes Patzerl mocht
Wauns Bett so richtig worm is
Und des Schlofbedürfnis enorm is
Und de Gegenwort frisst de Vagaungenheit
Daun is zum Aufstehn
Daun is zum Aufstehn
Höchste Zeit

Dabei hob i grod von ana
Insel in der Südsee tramt


Wo ma den gaunzn Tog de Arbeit versamt
Wo de glosklorn Wölln um de Zechn ziagn
Und de brotanen Taubn ins Mäu einefliagn
Wo da nosse Saund den Bauch massiert
Und di garantiert kan Nochbor seckiert
Wo jede Kokosnuss noch Freiheit schmeckt
Den Moment hot mi da teppate
Da teppate
Wecker g′weckt

Du grauslicha Tog, geh drah wieder um
Wort bis i di ruaf und daun kumm

Waun de Kinda mit de Poista schiassn
Net wissn ob sie in de Schui geh miassn
Da Schlof in olle Knochn knistert
Und da Lungenwurm good morning flüstert
De leber des Dienstverhöltnis auflöst
Und im Mogn da Rest vom Aufschnitt aufstösst
Da Nochbor de Müch geht üba schreit
Daun is zum Aufstehn
Daun is zum Aufstehn
Höchste Zeit

Dabei hob i no imma von der
Insel in der Südsee tramt


Wo ma den gaunzn Tog des Fernsehen versamt
Wo de worme Luft de nossn Hoor trocknlegt
Und ka Strauch ungfrogt a Blattl bewegt
Wo im Meer de klanen Fischerl schwimmen
De si net um dei politische Meinung kümmern
Wo da koide Wind unter Berufsverbot steht
Den Moment woch i auf wäu da teppate
Da teppate
Wecker geht

Du grauslicha Tog, geh drah wieda um
Wort bis i di ruaf und daun kumm

Heiliga Strohsock schon zehn vor siebn
Kinda hobts ihr a de Aufgob gschriebn
Eini in d'Hosn und eine ins Hemd
Des hob i ma denkt da Reissverschluss klemmt
Und vadaummt no amoi im rechtn Schuach
Do steckt von de Kinder a Rechnbuach
Wia i frog wos des Biachl do soll
Sogn′s seit waunn is aum Sunntog
Seit waunn is aum Sunntog
Seit waunn is aum Sunntog
A Schui

Du herrlicha Tog, geh drah di net um
Und du waches Bett, wort i kumm