Es rägnet i mis Glas voll Wii Songtext
von Dieter Wiesmann

Es rägnet i mis Glas voll Wii
Und d′Pfifä gaht mer uus
Ich sitz' elei und dänk debi
Und dänk mer′s Dänke us
Du liisch im Bett und korrigiersch
Im Traum dä hütig Tag
Ich sitz' elei und fräge mich
Warum ich dich so mag?
Warum ich dich so mag?


Wie gsehsch du us, wie luegsch du dri
Sind dini Auge blau?
Ich lueg is Glas und merk debi
Ich weiss es nit so gnau
Dänn d'Augefarb, die staht im Pass
Und intressiert mich nit
Wills hind′re dinä Augewänd
No wicht′gri Farbe git
No wicht'gri Farbe git

Wie tönts, wenn du luut uselachsch
Wie fluechsch du öppediä
Wie schmöckts, wenn du en Kafi machsch
Ich chönt nöd säge wiä
Äs fählt vo dir sogar dis Bild bi mir im Portmone
Will ich dich eifach jedesmal
Mit andre Auge gseh
Mit andre Auge gseh

Äs rägnet i mis Glas voll Wii
Und d′Pfifä gaht mer uus
Ich steck min Raucherchnebel ii
Und trink dä Reschte us
Wiso hät ein dä ander gern?
Wiso de ander dich?
Zum Glück laat eim bi dere Frag
D'Vernunft ganz schön im Stich
D′Vernunft ganz schön im Stich