La leggenda di Colapesce Songtext
von Otello Profazio

La genti lu chiamava Colapisci
Perchì stava nt′a mari comu un pisci
D'undi veniva non sapìa nessunu: forsi era figghiu di lu diu Nettunu
Un jornu a Cola ′u re faci chiamari
E Cola di lu mari curri e veni
Oh, Cola lu me regnu ha'
Scandagghiari... supra a chi pedamentu si susteni!
"Cola Pisci curri e va" "vaju e tornu, Maistà!"
"Cola Pisci curri e va" "vaju e tornu, Maistà!"


Cusì si jetta a mari Colapisci... e sutta a l'undi subitu sparisci
Ma dopu un pocu chista novità, a lu regnanti Colapisci dà
"Maistà, li terri vostri stannu supra a tri pilastri
E lu fatu è assai tremendu: unu già si sta rumpendu!"
"O destinu mèu infelici! Chi sventura mi predici!
Chiangi ′u Re, "comu haju a fari? Sulu tu mi pôi sarvari!"
"Colapisci, curri e và!" "vaju e tornu, Maistà!"
"Colapisci, curri e và!" "vaju e tornu, Maistà!"

Su passati tanti jorna... Colapisci non ritorna
E l′aspettanu a Marina lu Regnanti e la Regina
Poi si senti la so vuci di lu mari in superfici
"Maistà... Maistà!... Sugnu ccà... Sugnu ccà!
'Nta lu fundu di lu mari, chi non pozzu cchiù tornari
Vui pregati la Madonna... Staju reggendo la colonna
Ca sinnò si spezzerà... Ca sinnò si spezzerà
E ′a Sicilia sparirà!

Su passati ormai tant'anni: Colapisci è sempri ddhà
"Maistà... Maistà!... Sugnu ccà, sugnu ccà!"
"Maistà... Maistà!... Sugnu ccà, sugnu ccà!"
"Maistà... Maistà!... Sugnu ccà, sugnu ccà!"
"Maistà... Maistà!... Sugnu ccà, sugnu ccà!"
"Maistà... Maistà!..."