Räge Songtext
von Manuel Stahlberger

Stohsch uf am Morge und wäschisch s Gsicht
Machsch Kafi und losisch de Wätterpricht
Drü Wuche Räge seit de Maa
Du ghörsch Freudesprüng us de Wohnig näbedra
Und au im obere Stock bricht Begeischterig us
Und bald im ganze Stägehuus
Du machsch Türe zue und de Nachtvorhang
Und denn ghörsch es singe duss im Gang

D Sune isch nume en nötige Stern
Aber Räge, Räge hemmer würklech gern

Du stohsch am Fenschter und es rägnet a d Schiibe
Wieder en Tag zum i de Wohnig ine bliibe
Aber duss im Garte ghörsch Chinderlache
Sie sind im Schlamm am Fangis mache
Sie spieled mit Schnägge und Würm i de Rabatte
D Müetere lieged i de Hängematte
Mit em Ölzüg a und mit de Pellerine
Sie singed und du bisch als einzige dine


D Sune isch nume en nötige Stern
Aber Räge, Räge hemmer würklech gern

Aber chuum schiint mol paar Stund lang d Sune
Isch d Stimmig grad im Chäller une
Niemer will mit dir an See goh
D Chind spieled mürrisch mit ihrne Lego
Und di Grosse holed de Schnaps us em Schäftli
Und läsed i ihrne Rägemodeheftli
Schrägi Iifäll mit Schirm und Stiefel
Uf de Laufstäg in Paris
Und geili wasserdichti Oberteili
Klassisch gääl oder modisch wiiss

Doch au du muesch go poschte oder mol in en Spunte
Und vor de Migros stoht ein ime Gunte
Und seit Sune isch wärmer und Räge isch nässer
Aber Sune, min Sohn, isch überhaupt nöd besser
Wenn′s abe läärt macht üs da nüt us
Mir chömed mit schlammige Stiefel is Huus
I de Chuchi, im Büro isch alls vole Schlamm
Schlamm i de Badi und Schlamm im Tram


Mir stönd im Schlamm bis zu de Chnüü
Sumpf isch Trumpf, 1, 2, 3