Traumlied Songtext
von Heinz de Specht

Geschter bini znacht am drü ufgwacht i mim Bett,
ha tröimt gha vome Lied wien ich scho lang gern schribe wett,
dr Texscht isch total packend gsi und irgendwie mit Witz,
und d Musig die het tönt wie bi de allergröschte Hits,
i ha no jedes Wort im Ohr und weiss d Akkörd ufem Klavier,
ja de Song da us mim Traum de muess itz sofort uf Papier!

Für so Fäll han ich e sone chlises Büechli nebem Bett,
Wos uf ganz vil leere Site Platz für Liedidee het,
Also tascht ich mich im Dunkle zu mim Nachtischlämpli hi,
und vo dert am Kabel witer müesst dr Schalter nöimet si.
Doch weder s Lämplischalterkabel no mis Nachttischlämpli sind,
im Dunkle öppe dert wos söttet si so dass ichs find!

Mi sötti nie haschte, bim Taschte im Dunkle!
Ich taschte im Dunkle.


Ich ha dr Lämplischalter doch no gfunde a de Kabelschnur,
doch jetz won ich chönnt schriibe, fehlt vom Bleistift jedi Spur,
uf dr Suechi nach chli Liecht hani vermuetlech us Verseh,
em Schriber mitem einte Arm es chlises Schüpfli ge,
und ich entdeck dr Stift zmitz undrem Bett im Staub und muess drum so,
total verchrüpplet mit de Fingerspitz probiere ane z cho.

Da rutsch ich samt de Decki usem Nescht und weck so mini Frau,
wos nid gern gseht wenn ich znacht s
Liecht amach und ihre d Decki chlau,
si frührt nid gern as Füdli und wett wüsse was das söll,
und ich verzell vom tröimte Lied won ich sofort notiere wöll,
währenddem ich in Erchlärigsnot um Wort am ringe bin,
merk ich vom Lied woni hüt tröimt ha chunnt mer gar nüt meh in Sinn!

I chönnti raschte, ich taschte im Dunkle!
Ich taschte im Dunkle.

Inzwüsche isch es füf ab drü, und s Lied isch würkli weg,
es fallt mer nümme i, egal wie fescht ich überleg,
ich versueche witer z tröime doch mit schlofe isch verbi,
vo däm Traumlied isch nüt übrig, käs Wort ke Melodie,
ich gang übere id Stube und ich hocke as Klavier,
villicht chunnt ja d Erinnrig zrugg, wenn ich dette chli probier?


Und ich suech jedi Tonart ab und fange a in "C",
spil dürab de Quintezirkel bis Ces Dur mit sibe "b",
irgendwo muess s Lied versteckt si, und als ob das öppis nütz,
machi s gliche Spili nomel mit de Tonarte mit Chrütz,
wil ich bis Fis Dur nüt cha finde laschtet alli Hoffnig voll,
uf sibe Chrütz, Cis Dur respektive uf Ais Moll, Ais Moll...

Ich chönnti raschte, ich taschte im Dunkle!
(Uf de dunkle Taschte im Dunkle.)
Ich taschte (taschte) uf de dunkle Taschte im Dunkle.

I han erfolglos witergsuecht gha no di ganzi Nacht,
und bim Zmorge wird mer klar, ich ha vergebe düregmacht,
jetz stun ich sälber über mini nächtlich Euphorie,
im Traum perfekti Lieder finde wär zu traumhaft gsi,
was übrig blibt sind Augering und s truurig Resumé,
ich stand do mit leere Händ und ha ken Song und kai Idee.