Quanno nascette ninno Songtext
von Enzo Avitabile

Quanno nascette Ninno a Betlemme,
Era notte e pareva miezojuorno
Maje le stelle,
Lustre e belle,
Se vedèttero accussí
E ′a cchiù lucente,
Jette a chiammá li Magge a ll'Uriente

De pressa se scetajeno ll′aucielle
Cantanno de na forma tutta nova
Pe' nsi' ′agrille,
Co′ li strille,
E zompanno 'a ccá e ′a llá
- E' nato E′ nato
- Decévano lo Dio che nce ha criato


Co' tutto ch′era vierno, Ninno bello,
Nascettero a migliara rose e sciure
Pe' nsi' ′o ffieno,
Sicco e tuosto,
Ca fuje puosto sott′a te,
Se 'nfigliulette
E de frunnelle e sciure se vestette

A no paese che se chiamma Ngadde,
Sciurettero le vvigne e ascette ll′uva
Ninno mio
Sapuretiello,
Rappusciello d'uva si′ tu
Ca, tutt'ammore,
Faje doce ′a vocca e po' 'mbriache ′e core

Non c′erano nemice pe' la terra
La pecora pasceva co′ 'o lione
Co"o capretto,
Se vedette
′O liupardo pazzeá
Ll'urzo e ′o vetiello
E, co' lo lupo, 'mpace ′o pecoriello


S′arrevotaje 'nsomma tutto munno
Lo cielo, ′a terra, 'o mare e tutt"e ggente
Chi dormeva,
Se senteva
′Mpietto core pazzeá
Pe' la prejezza
E se sonnava pace e contentezza

Guardavano le ppecore, ′e Pasture
E n'Angelo, sbrennente cchiù d"o sole,
Comparette
E lle decette
No ve spaventate, no
Contento e riso
La terra è addeventata Paraviso

Contento e riso
La terra è addeventata Paraviso