Et Stina muss ’ne Mann han Songtext
von Bläck Fööss

Et Stina muß ′ne Mann han

Frau Dänz, die hät en Döchterche, e Kind wat Stina heisch.
Dat hät för singe Knochenbau am Liev zo winnig Fleisch.
Met einem Woot, et es su schön, wenn it em Feld deiht stonn,
Die Mösche dann vör luuter Angs nit ahn der Haver jonn.
Och weil et Stina uhs dem Jan, Frau Dänz sich Sorge maat,
Un eines Dags met ihrem Mann Frau Dänzgen's üvverlaat:

Et Stina muß ′ne Mann han, et weed die höchste Zick!
Et Stina muß 'ne Mann han, söns wähde mer't nit mie quitt.
Et Stina muß ′ne Mann han, ov alt hä oder jung,
Denn bliev et Stina setze, wör′t schad för dat Fazzung.


Et woht doheim nit mie gespohlt un nix mie ahngepack,
Denn jeden Dag do wurf sich jetz et Stina en der Lack.
Der Vatter met der Selvkantbotz, am Ärm et Paraplü,
Un die Frau Dänz me'm Üvverwurf un seidene Fischü.
Su gingk et ovends op d′r Ring, no Huhs un widder öm,
Vielleich su fuffzehn, zwanzig mol, un weßt ihr och, woröm:

Et Stina muß 'ne Mann han...

Em Stadtwald, em Zoolonische, beim Nohmeddachskunzäät,
Die drei dann do ze setze sinn, dat es de Möhde wäht.
Dä Ahl, dä deiht de Muul nit op, sei trick die Leppe kruus,
Un wie e Hohn, dat halv geplöck, su süht et Stina uhs.
Wer sich no ahn dä Desch verläuf, glich drop sich widder dröck,
Denn wä en beßje Ahnung hät, der merk′ beim eezte Bleck:

Et Stina muß 'ne Mann han...

′Ne Mann zo finge, dat hält schwer, zumal et Stina Dänz.
Hät keine Mangel ahn Malheur, doch mieh an Inteljenz.
Nemm nor wat kütt, sät off die Ahl, un bes nit su schinannt!
Et bruch jo keine Graf zo sinn un keine Leutenant.
Of hä e Pößge ahn der Poß, of Fuhrparksadmiral,
Un wann et och 'ne Schnieder es, et bliev sich janz ejal:

Et Stina muß 'ne Mann han...